كتب ايلي مكرزل في موقع JNews Lebanon
بتكتر الأعمال الدرامية بشهر رمضان الكريم وبتكبر المنافسة على مين نجمة رمضان الأولى ومين نجم العرب.
والحلو إنو كل المسلسلات “Trend” وكلن عندن نسبية مشاهدة كتير عالية، ما حدا فشل، حتى لو المسلسل ما نجح بس صناع العمل بيخلقو بكتير من الأوقات نجاح لو كان وهمي لبعض الأعمال والأسباب مختلفة وكلنا منعرفا.
من بعد ما حكيت عن مسلسل للموت ٣، ما فيي غض النظر عن نجاح مسلسل النار بالنار
ما رح فوت بتفاصيل، خاصةً بالخلاف وتراشق الاتهمات بين الكاتب والمخرج عبر مواقع التواصل الإجتماعي
ولا رح احكي عن الهفوات يلي عم يوقع فيا العمل.
قصة واقعية على الرغم من المبالغات والتطويل بكتير من المطارح ويلي لفتلي نظري بهالعمل حضور الممثل طارق تميم والممثلة ساشا دحدوح يلي عم بكون في بينن كيميا كتير كبيرة والحوار عم بكون كتير واقعي بعيد عن التكلف والتصنع.
طارق تميم نجم الكوميديا قدر يثبت إنو ممثل درامي ترفع له القبعة، وقدر يكون واقعي بشخصية جميل ويتمكن من الشخصية لأقصى حدود.
وفينا نقول إنو طارق معو كل المفاتيح الأساسية لشخصية جميل يلي عرف يستخدما بطريقة كتير محترفة، بأسلوب حلو حتى المشاهد قدر يتعلق بهالشخصية ويعيش معا كل لحظة بلحظة.
View this post on Instagram
ساشا دحدوح، أكيد ساشا صبية حلوة وعندا حضور وكاريزما… بس مش هيدا سبب نجاحا أبداً بدور قمر، إذا بدنا نحكي الأمور متل ما هي كتير مهم نقول إنو هيدا رح يكون مفصل بحياة ساشا التمثيلية.
تفاصيل شخصية قمر يلي لعبت علين البطلة وقدرت من خلالن تخلق هوية مختلفه للشخصية كان من خلال الشكل أو من خلال الأداء يلي متل ما سبق وقلنا عفوي، واقعي وقريب من الحي الفقير والمشاكل يلي عم بعشوا.
جورج خباز … مبدع من لبنان، استاذ بكل ما إلا الكلمة من معنى، بمثل بكل تفاصيلو بكل أحاسيسو. جورج خباز إضافة لكل عمل بكون موجود في.
وعلى الرغم من قساوة النص ببعض الأوقات، منقدر نتأكد إنو أسلوب وطريقة شغل جورج على دور عزيز نقل الفكرة والموضوع وحتى الأحساس بطريقة عنجد قوية.
كاريس بشار … حلوة بطبيعة دورا والجرأة يلي عم تلعب فيا دور مريم حتى نبرة الصوت، المشية والحركات بمحلن وكتير عم يلفت نظري الحوار أو المشاكل يلي عم بتدور بين كاريس وزينة مكي لو ببعض الأوقات كان في مبالغة بالموضوع.
زينة مكي الصبية يلي قدرت تثبت حالا يوم عن يوم، وقدرت توصل موهبتا الكبيرة، عم تلعب بكل شغف وفينا نقول إنو هيدا النوع من الأدوار هوي ملعبا.
طوني عيسى، الإختلاف بالشخصيات يلي عم بأديا، من مسلسل لمسلسل، ورقة رابحة وإيجابية
وعلى الرغم من الجدلية الكبيرة حول شخصية طوني عيسى بمسلسل النار بالنار إلا إنو هيدا الدور من أصعب الأدوار يلي عم بأديا.
عابد فهد، غموض حول الشخصية يوم عن يوم عم تتوضح الصورة أكتر ومع إنو في عدة علامات إستفهام حول الشخصية وطريقة وجود عمرا بالحي وكيف عم يتحكم بكل التفاصيل، إلا إنو عابد فهد مبدع وحاضر بقوة بهالموسم الرمضاني.
على أمل إنو عطول نشهد على أعمال جديدة ومختلفة بالشكل والمضمون متل مسلسل النار بالنار.
