حاوره ايلي مكرزل من موقع JNews Lebanon
على الرغم من انشغالاتو الكتيرة بحفلات موسم الصيف والنجاحات الكثيرة يلي عم يحققها مع كل عمل جديد، قدرنا نسرقو ونعمل دردشة سريعة مع النجم اللبناني سعد رمضان بلقاء اتسم بالعفوية والصراحة متل ما دايمًا معودنا.
- قديش حياتك الشخصية بتأثر على اختياراتك الفنية، خصوصاً على صعيد إختيار الأغاني؟
إجمالاً ايلي أغلبية الأغاني يلي غنيتا بمسيرتي الفنية كانت بتعبر عن الحالة يلي أنا عم عيشا بهيدي اللحظة، بحاول قد ما فيي إختار أغاني أنا عم حسا لأنو بعرف إذا أنا حسيتا،رح يحسا المستمع إجمالاً ٩٠% من الأغاني يلي غنيتا كنت بحسا، هلأ لا شك بكون في أوقات أغاني منختارا لأن بهيدا الوقت لازم نختار هيك “Style” أغاني، بس الأغلبية من الأغاني كانت بتعبر عن شخصيًا.
- وين الحب بحياة سعد رمضان، خصوصاً إنو كل فترة منسمع خبر عن ارتباطك؟ وهل رح تكون عريس الموسم قريباً؟
الحب دايماً موجود بحياتي، بس هلأ ما في علاقة حب أو أي علاقة جدية، خصوصًأ إنو من فترة كنت بعلاقة ولفترة كتير طويلة بس ما كمل الموضوع، وما كملنا. عريس الموسم؟ ما بظن إنو رح كون عريس الموسم هيدا الموسم، هلأ الموسم الجاي يلي بعدو بعد ١٠ سنين الله وأعلم، ما حدا بيعرف هيدا نصيب.
- شو يلي إختلف بسعد رمضان بين “خلص الوقت” و “نسيتك والله”؟
أوف… إختلف كتير اشيا، الحياة بتطور دائم، الحياة بتجدد دائم، الحياة بتعلم دائم، الواحد بيتعلم كتير اشيا بين “خلص الوقت” و “نسيتك والله” غلطت كتير وتعلمت من غلطي، لا شك نضجت كتير، لا شك صرت أعرف شو بدي أكتر وأكتر مش بس على صعيد الفن، على صعيد حتى حياتي الشخصية العمر والوقت بخلي الانسان يكون أنضج، يكون عارف شو بدو أكتر، أنا بعتبر إنو هيدي المرحلة هلأ هي أكتر مرحلة حلوة بحياتي ودايماً بيسألوني ليش؟ بقلن لأن أكتر وقت عارف حالي شو بدي.
- كتار بالوسط الفني عم يشكو من شح بالنصوص الغنائية شو تعليق سعد رمضان عالموضوع؟ وشو السبب برأيك؟
ممكن ايلي مش قصة شح بالنصوص، يمكن كترت الأغاني وكترت الأذواق صارت صعبة كتير إنو تلاقي أغنية مميزة، وهيدا بحكم إنو صار في كتير أغاني وصار كل لحظة ولحظة عم يطلع فنان وكل لحظة ولحظة عم تطلع أغنية، وكل لحظة ولحظة عم تطلع فكرة. وهيدا الشي مش جديد بس مؤخراً صار في كتير أغاني أنا عم بسمعا هلأ لو سمعتا من أربع خمس سنين يمكن كنت أخدتا، بس هلأ ما عم باخدا لأن تغير شوي المستمع، صار في أنواع كتير جديدة من الموسيقى، هيدا الشي طبيعي وهيدا موجود بتاريخ الموسيقى كلو، من المدارس الفنية يلي تعلمنا على اديا لحد اليوم، دايماً الفن بتطور ودايماً الفن بتجدد، أكيد صعبة شوي، أصعب من قبل يمكن بس هون شطارة الانسان إنو يحاول ويضل يشتغل على إنو يطور من حالو ويلاقي أفكار جديدة.
- ظاهرة الذكاء الإصطناعي مسيطرة على مواقع التواصل الإجتماعي خصوصاً من خلال الأغاني شو رأيك بهالظاهرة؟
صراحة قصة الذكاء الإصطناعي أنا مش كتير فاهما بعد متل كأنو في كتير قصص جديدة مش بس بالفن، حتى متل قصص “NFT” وكل هيدي القصص يلي كنا نحسا قبل خيالية ومش ممكن تصير عم بتصير، وهيدا شي طبيعي كمان، من عشر سنين أو عشرين سنة ما كنا نتخايل إنو في تليفون ونفتح ” Video Call” نحكي مع أشخاص بعاد عنا، متل كتير اشيا تطورت بهيدي الحياة أنا بحب كتير إنو كون موجود دايماً بالاشيا الجديدة وبحب دايماً اتعلم على الاشيا الجديدة، لأن الحياة أنا بعتبرا قطار وماشي لازم نكون موجودين بهيدا القطار ومستحيل ننزل منو. يوم بعد يوم عم حاول إكتشف أكتر شو هوي الذكاء الإصطناعي وأكيد رح نوصل لوقت رح يكون هوي المسيطر، متل ما كان اول شي الكاست مسيطر وقبلو الإسطواني، هلأ في ال ” Social Media” والحياة بتطور دائم.
- بعيداً عن الفن سعد رمضان هو صاحب شركة “Bluediamond” عم منلاحظ إنو أغلب الفنانين عم يلجأوا لBusiness تاني تزامناً مع الفن، هل برأيك هالشي خوفاً من عدم الإستمرارية بالفن؟
أولاً أنا بالظبط صاحب شركة “BlueDiamond” للعقارات الموجودة بتركيا وصح إنو في كتير فنانين عم يلجأوا لل Business ويمكن مؤخراً كتير من بعد جائحة كورونا يلي صارت، لأن كورونا كانت إلى حد ما كف
بالنسبة للفنانين، نحنا اعدنا سنتين تلاتي بلا شغل، يلي كان مأسس حالو مظبوط ويلي كان عامل شي تزامناً مع الفن إنتبه إنو هيدا الشي صح ويلي ما كان عامل صار يفكر مليون مرة إنو لازم يكون عندو شي بوازي شغلو بالفن أو تزامناً مع شغلو بالفن، مرق كتير فنانين كبار بالفن شفنا اخرتن كتير صعبة، فا أنا من أول يوم دخلت في الفن كنت فكر بهيدي الطريقة إنو يكون عندي شغل تاني خاص فيي.
- بعد النجاح الكبير يلي حققتو أغنية “نسيتك والله” شو عم بحضر سعد رمضان؟
للأمانة أنا كتير حابب الأصداء يلي عم تاخدا “نسيتك والله” وكتير مبسوط بهيدا الموضوع ولليوم بصرلا الغنية شهر ونص وبعدني ما عم لحق ال- repost على social media وبعدا أغلبية ال Comments
إنو شلنا الغنية من راسنا لأن عنجد ما عم تطلع من راسنا، وهيدا الشي كتير بحبو، وكتير حبيتو بهيدي الغنية تحديداً، يمكن لأن حسيتا لهيدي الأغنية كرمال هيك الناس حبتا، عم منحضر أكيد لأغنية تانية جديدة بس بعد ما وقع الإختيار على ولا أغنية، أنا بتأنا شوي زغيرة بعد كل أغنية بحب أعطيا وقتا على الأقل ٣ أشهر هيدي أقل شي.
بنهاية حديثنا شكر كبير للنجم سعد رمضان على هالدردشة الحلوة وكل النجاح بكل خطواتك وكل أعمالك الجديدة.
