كتب إيلي مكرزل في موقع JNews Lebanon
خلال إنطلاق عرض فيلم “ضيوف شرف” بمجمع ال ABC بمنطقة ضبيه كان النا دردشة سريعة مع بطلة العمل ستيفاني عطالله حتى نحكي عن الفيلم وعن مجمل أعمالا، نجاحتا وبعض التفاصيل عن حياتا بعفويتا المعتادة وخفة دما. دردشتنا كانت أكتر من رائعة
- ستيفاني بالبداية مبروك إنطلاق عرض فيلم “ضيوف شرف”، خبرينا شوي عن هالتجربة وعن دورك تحديداً.
مرسي كتير ايلي، كانت تجربة كتير حلوة على الصعيد الشخصي وعلى الصعيد الفني لأن كنا كتير عم نتسلى كل الوقت، فريق العمل كلنا أصدقاء مع بعض من قبل الفيلم، كان الجو لذيذ بالكواليس وبمأنو بطبيعة الحال الفيلم كوميدي وخفيف وهيك مهضوم والقصة محورا حول شي غريب ومجنون، كنا حتى بالمشاهد عم نتسلى وعم نضحك وكان الجو إيجابي كل الوقت، وبتمنى إنو العالم يحسو بهيدا الإحساس لي نحنا حاسينو تجاه هيدا الفيلم، يروحو يحضروا ويضحكو، يمبسطو ويقضو وقت حلو. أما عن دوري بالفيلم، بلعب دور بنت إسما “أمل” بتكون محطوطة بمستشفى للأمراض النفسية، مصح عقلي إذا بدك وبتكون بهيدا المطرح من أول الفيلم ونحنا ما عم نفهم ليش، بيوم من الايام بتقرير تطلع من هالمصح لأن بتعرف إنو في عرس اختا عم بصير، بتاخد إذن حتى تطلع وتخرب العرس، وهون منشوف هالشخصية لأي مدى هي مضطربة ولأي مدى هي مظلومة ومنفهم عقلا أكتر لأمل، وشو هالقرار الغريب إنو هي تطلع وتخرب العرس، دور كتير كوميدي ومهضوم وفي شي كتير جديد، مش متقدملي أدوار من هالنوع من قبل.
- قريباً ببلش عرض مسلسل “كريستال” بطولتك إلى جانب الممثلة باميلا الكيك، عم منلاحظ إنو المسلسلات المقتبسة عم تحقق إنتشار واسع بس بنفس الوقت عم تتعرض لإنتقادات بسبب المماطلة، الأحداث الغير منطقية وغيرا شو تعليقك عالموضوع؟
بخصوص مسلسل “كريستال” Yes قريباً رح يكون على الMBC1 وعلى شاهد، أكيد هيدا النوع من المسلسلات هلأ دارج إذا بدك، ودارج لسبب إنو العالم عم بتحب وعم يشبها هالنوع من الأعمال وعم يلفتلا نظرا لأن المشاهدين بحسوا حالن عم بتابعوا حدا من عيلتن، لأن هيدا النوع من المسلسلات الطويلة بخلين بعيشوا مع الشخصيات، بصيروا عنجد يفتقدولن لما يخلص المسلسل وهيدا الشي بيلعب لصالح الممثلين المشاركين بالعمل وشركة الإنتاج لما ينجح العمل ككل.
قصة النص ايلي يلي عم بتقول عنو هوي MIX نص جميل، ولا المثلين يأدو بطريقة لذيذة ولا ولا ولا، بعتقد إنو هوي “team work” كبير، لما كل هول يكونوا بنفس العمل مش رح تحسوا عم بماطل، إذا بتحس في مسلسل عم بماطل بدوا يكون في سبب معين، ما فيي قلك كل عمل كيف بكون وشو الأسباب يلي بتخلي إنو المشاهدين يحسوا عم بماطل، بس فيي قلك إنو نحنا ٩٠ حلقة ومن النص لما أنا قريتو شفت إنو بكل حلقة بآخرا في مفاجأة وفي اشيا جديدة بكل انطلاقة حلقة، فا ما بعتقد أبداً رح يكون هيدا العمل من النوع يلي بماطل، رح يكون مشوق والمشاهدين رح يشوفو إنو كل حلقة رح تقدملن إضافة على المسلسل.
- ثنائية نسائية جديدة بينك وبين باميلا الكيك، خبرينا شوي عنا وعن كواليس التصوير بيناتكن؟
بمسلسل “كريستال” عم بلعب دور بنت إسما “فيي” وباميلا عم تلعب دور بنت إسما “عليا”، ونحنا من أول المسلسل للإخر بوج بعض، هيدي الثنائية النسائية بهيدا العمل وبكون عنا كتير بين شخصيتنا بالأول منكون كتير بعاد، منتقرب بطريقة وبتخلق هالمواضيع يلي بتفوتنا بكره ولا بحب ولا بصداقة ولا أخوية ومنرجع بكره من جديد، يعني ما رح نفهم أبداً هالبنتن شو هالشي يلي بحرك العلاقة بيناتون وهيدا الشي كتير حلو لأن بالمسلسل عندك مسيرة القصة بتطلع وبتنزل وهالشخصيتين أدوارن كتير حلوين.
الشغل مع باميلا كان كتير لذيذ الجو وهي كتير كانت عم تعطي من قلبا متل ما أنا عم بعطي من قلبي وبعرف إنو هي بتشتغل بشغف وبتمنى إنو العالم يحبو شغلنا على قد ما نحنا حبينا هالشخصيتين يلي لعبناهن.
- شتغلتي تليفزيون، مسرح وسينما شو الأقرب لقلب ستيفاني؟
سينما، مسرح وTV ، كل نوع بيختلف للممثلين وللمشاهدين كمان. المسرح لما تشتغلو بتفوت بنمط حياة معين بتحس بطاقة الجمهور قدامك، المشاهدين بكونو كل ليلي بوجك عم يطلعوا بعيونك في شي سحر بالمسرح. بالTV في سحر بخليك توصل على بيت المشاهدين، على قلوبن وهيدا الشي بيخلق حب كتير حلو بين الممثل والجمهور والسينما في سحر ما بينوصف بتكون قاعد بصالة الشاشة من ميلة لميلة وعم تسمع الأصوات وعم يرجف قلبك قد ما ال “Sound system” حلو وقوي. وبتحس بشي كتير مميز لما الأفلام يروحو على مهرجانات وعالم من خارج البلد والمنطقة، ويمكن ما بيحكو لغتك يكونوا عم بتابعو فيلمك وعم يتأثروا ويحسوا معك في، أنا إلي ما فيي فرق أبداً بين، كيف الأهل لما يقولوا أنا قلبي بساع كل ولادي أنا عندي هيدا الإحساس وإلي الفن هوي فن بأية طريقة بتعبّر عن حالك بتكون إنت مرتاح ومبسوط وحاسس حالك عنجد عم تعمل الفن يلي إنت بيشبهك وأنا هيك بحس حالي.
- أغنية “البكلة” حققت نجاح وإنتشار كبير، توقعتي نجاح الأغنية؟ وهل ممكن نسمع ستيفاني وZef بعمل جديد؟
غنية “البكلة” كانت Surprise كتير حلوة بحياتي، من أول ما إنطلق المشروع لحد ما العالم بلشوا يسمعوا وصارت Trending على كل المواقع الإجتماعية، توقعت إنو العالم يحبوا صراحة لأن أنا حبيتا لما سمعتا وZef كتبا ولحنا ووزعا بمساعدة الموزع “سليمان دميان” هوي صديقنا إشتغل عليا ووزعا وعطا من قلبو.
أنا كنت عارفي إنو هيدا productناجح، بعرف من الأول. بس لما إنت تكون فنان وتعطي من قلبك أكيد أكيد ما فيك تقول مية بالمية، أنا أكيد إنو رح ينجح ويضرب ويكسر الدني لأن ما بتعرف ردة فعل المشاهدين على ولا عمل. فيك إنت تكون واثق كتير من العمل والمشاهدين ما يعلق علين. وهيدي كانت Surprise كتير حلوة إلي لما شفت عنجد كل هالناس عم يسمعو “البكلة” وعم بحبوا وبعدن لهلأ عم بغنوا، صرلا الغنية سنة وشوي وبعدا بتحسا لهلأ It’s a Hit ، and I’m so proud .
هل معقول أعمل غنية جديدة مع Zef وكون بعمل جديد معو، أكيد why not كانت تجربة كتير حلوة، أكيد ما بقول لأ إنو يكون في بعد Projectبيناتنا لأن بحب إشتغل معو على الصعيد الشخصي على الصعيد الفني كمان.
- معقول نشوفك عروس ٢٠٢٣؟
عروس ٢٠٢٣ (ضاحكة) ما بعرف، مني بعد كتير مفكرة بالموضوع وكل شي بوقتو حلو، بكرا منشوف.
- بعد كل هالنشاط الفني وكل هالنجاحات شو في أعمال جديدة؟
أعمال جديدة… متل ما قلنا ضيوف شرف بالسينما، كريستال رح يبلش على شاهد وعلى MBC1، وفي عنا فيلم “إيمان” يلي بعدو عم يعمل برمة مهرجانات، وفيلم “فرح” على نتفلكس بعدو لهلق عم يعمل برمة مهرجانات عالمياً وقريباً انشالله بكون في خطوة موسيقية وأكيد عمل سينمائي جديد خارج لبنان، دعولي بالتوفيق وببقى بخبركن عن كل شي جديد.
كل التوفيق للممثلة ستيفاني عطالله بكل أعمالا ومن نجاح لنجاح أكيد، شكراً على المقابلة الرائعة وأكيد النا لقاءات بالمستقبل مع كل عمل.