كتب ايلي مكرزل في موقع JNews Lebanon
دردشتنا اليوم مع إعلامية قدرت تكون حديث الناس من خلال ذكاها، ثقافتا وحتى جمالا، ويوم عن يوم قدرت تثبت أكتر وجودا على الساحة الإعلامية من خلال تنوع برامجا شكلاً ومضموناً.
- كارلا حداد بالنسبة الك العمل الإعلامي هواية أو مهنة؟
أنا بعتبر العمل الإعلامي هواية ومهنة بنفس الوقت، مهنة لأن أي شي بتعملو إذا ما بتاخدو على محمل الجد وبإحترافية وبتفكير إنو هيدي مهنتك يلي لازم إنو توصل بأفضل شكل للناس، بتفشل. وبنفس الوقت بعتبرو هواية لأن أنا بحس حالي ربنا ناعم عليي إنو عندي شغل أنا بحبو، لأن الانسان لما يكون عندو شغل بيحبو ببطل يحس حالو رايح على الوظيفة، رايح على الواجب مجبور إشتغل، حتى أعمل مصاري أو مهنة معينة، لأ أنا من هالناحية بعتبر العمل الإعلامي هواية لأن أنا عندي شغف للعمل الإعلامي وعندي حب لهالمهنة، بتنفس أنا وعم بشتغل، بحس حالي عايشي أنا وعم بشتغل. لهالدرجة بحب شغلي، كرمال هيك ايلي بحب الك إنو العمل الإعلامي بالنسبة إلي هو هواية ومهنة بنفس الوقت.
- مين بنافس كارلا حداد بالوسط الإعلامي؟
مين بنافس كارلا حداد بالوسط الإعلامي؟ بالنهاية نحنا المنافسة مفتوحة على مصراعيها والمنافسة حلوة ومنا بشعة أبداً، بس أنا مش عم بطلع صراحة على غيري، أنا دايماً بجرب كون عم نافس نفسي. بالبرنامج الجديد بدي كون عم نافس حالي بالبرنامج يلي قبل، بإطلالتي الجديدة بدي كون عم نافس حالي بإطلالتي يلي قبل حتى اقدر قدم الأفضل دايماً، فبحرص أنو كون مركزي على حالي.
وأنا بعتقد إنو الانسان يلي بركز على حالو بينجح وبعلم عند الناس أكتر من يلي همو غيرو حتى ينافسو. أنا بنافس نفسي حتى اتحدى نفسي، حتى دايماً كون بافضل صورة شكلاً ومضموناً للمشاهدين.
- مسيرتك بالمجال الإعلامي طويلة وخلال هالفترة حاورتي شخصيات كتيرة، خبرينا عن أصعب حوار قدمتي؟
ما في حوار صعب وحوار سهل، أنا بلاقي الصعوبة بالحوار إنو ضيفك ترتاح معو وبنفس الوقت تريحو، تجرب تكتشف جوانب جديدة من شخصيتو أو من حياتو من دون ما يكون scoop حتى تفضحو أو تزركو أو تعمل مشاكل. لأن أنا مش هيدا ستيلي بالحوار، وأنا هون بلاقي صعوبة يعني تلاقي شي جديد “interesting ” للناس من دون ما يكون مؤذي للضيف وهيدا هوي الجانب الصعب للحوار.
- قديش بتختلف شخصية كارلا حداد خلف الكاميرا؟
صدقني ايلي ما كتير بتختلف شخصيتي الحقيقية عن كارلا أمام الكاميرا، لأن بالنهاية الشخص المتصنع ما بيوصل للمشاهد وأنا على طبيعتي، يعني الأشخاص يلي بيعرفوني عن قرب بيعرفو إنو يلو عم قولو صحيح. أنا ما بجرب آخد شخصية مختلفة قدام الكاميرا وبرجع بشلح الماسك وبكون غير شخصية ورا الكاميرا، أنا متل ما أنا وين مكان بحوار صحفي، بمقابلة عم تنعمل معي أو مقابلة أنا عم حاور ضيف، بالحياة مع أصحابي أنا هيك.
- إذا طلب منك إختيار سياسي لبناني واحد وطرح عليه سؤال بس مين بتختار كارلا حداد وشو السؤال؟
سياسي لبناني واحد؟ رياض الصلح … بسألو شو رأيك بهالشلة يلي عنا ياها؟
- كارلا، قبل ما ننهي حديثنا هل رح يستمر برنامج “The stage ” بعد شهر رمضان الكريم؟
اه نعم، رح يستمر ” The Stage” بعد شهر رمضان.
بنهاية حديثنا كارلا شكراً على هالدردشة الحلو وأكيد ناطرينك بكل أعمالك وبكل شي جديد.
