كتب ايلي مكرزل في موقع JNews Lebanon
قبل بداية عرض مسرحية “بضاعة ناعمة” على خشبة المسرح حبينا نعمل دردرشة سريعة مع كاتب، منتج وبطل المسرحية رالف معتوق حتى نحكي معو عن تفاصيل هالعمل وكتير أمور غيرا.
- رالف معتوق أول شي مبروك مسرحية “بضاعة ناعمة” خبرنا عنا شوي؟
شكراً ايلي على المباركة وبتمنى إنو المسرحية تنال اعجبك بس تحضرا، مسرحية “بضاعة ناعمة” هي مسرحية إجتماعية بحت، رح تخبر قصة ٣ نماذج من المجتمع، ٣ أشخاص كل حدا منا في يشوف حالو فين، مجتمعين بمكان مجهول الهوية بس مع مرور الأحدث رح نكتشف شو هو هالمكان، وليش هني هونيك ونسمع كل شي رح يخبروا، وبفتكر كل حدا رح يكون عم يحضر رح يلاقي حالو بوحدة من هالشخصيات.
- بين “أوضة سعاد” وبضاعة ناعمة” شو يلي اختلف برالف معتوق؟
الإختلاف يلي صار مش برالف كرالف الانسان، صار أكتر بالثقافة العامة يلي عندي ياها، يلي بحرص إنو كل سنة تكون عم تطور من خلال القراءة، الأبحاث يلي بعملن عن المواضيع يلي بدي إكتب عنا،
وإذا بدي قول في شي مختلف، إذا بدك “بضاعة ناعمة” هي أسلوب كتابة مختلف عن أسلوب كتابة “اوضة سعاد” بس أسلوب فني مختلف أكتر ما إنو إختلاف بشخصي أنا كشخص.
- هل تم كتابة النص لسمارة نهرا وفرح بيطار أو تم إختيارن بعد مرحلية الكتابة؟
متل كل عمل ببلش ينكتب، بلشت إكتب كان همي بالأحداث، بالشخصيات، بالأمور الفنية بحت قبل ما بلش فكر مين الممثلين. بس لما تطور النص ما بكذب عليك بلشت شوف شوي إنو بيلبق هيدا الشي لسمارة وفرح، حكيتن وكتير انبسطت إنو رحبو بالفكرة.
- قديش المسرح تأثر بكل الأزمات يلي مرق وعم يمرق فيا لبنان؟
المسرح كتير تأثر ايلي بالأزمات يلي مرقنا فيا كان كورونا، إنفجار المرفأ، خاصةً كورونا بعد أكتر من غير اشيا. نحنا اعدنا سنتين أو سنتين ونص بلا أعمال مسرحية، وصار في تجارب لأعمال مسرحية تنعرض اونلاين بس ما نجحت، فكتير تأثر المسرح بس بنفس الوقت هيدا التأثير لعب دور إيجابي لما خفت كورونا ورجعت فتحت المسارح. اليوم الإقبال عالمسرح أقوى من الإقبال حتى عالسينما هيدا الشي بمحل كان كتير سلبي من بعدا أثر عالمسرح بطريقة إيجابية، اليوم نحنا أقل موسم عم يمرق عم بكون أقل شي في ٥ لا ٨ أعمال عم تنعمل بكمية مسارح كتير قليلة.وهيدا دليل كتير صحي على أمل يصير في عنا مسارح أكتر.
- عطني إسم ممثلة بقول رالف هالممثلة حلمي إشتغل معا مسرح؟
في اسمين دغري بيخطرو عبالي لهني عايدة صبرا يلي كان ممكن يكون في تعاون بيناتنا قبل ما تهاجر والإسم التاني جوليا قصار.
- اشتغلت مسرح وتلفزيون وين مساحة الحرية أكبر بالنسبة الك؟
لحد هلأ نوعاً ما الحرية بالفن بلبنان موجوده وين مكان، بس أنا إذا بدي إختار، بختار مسرح لأن أنا بكتب وأنا عم بنتج فنوعاً ما قادر اتحكم بكل شي فهيدا نوع من الحرية.
فبنقي المسرح، بس حتى بالأعمال التلفزيونية كان عندي حرية بالأدوار يلي لعبتا.
- فرضاً بدك تختار ممثل ياخد دورك بمسرحية “اوضة سعاد” و “بضاعة ناعمة” مين بيختار رالف معتوق؟
ما في إسم معين براسي لأن الشاطرين والموهوبين كتار، بس إنو مطلق أي شخص عبالو يخاطر، لأن بالعملين الأدوار يلي عم بلعبون مش تقليدية أبداً، ب اوضة سعاد لعبت دور شخص عندو توحد فكتير أخد مني وقت وتحضير وتعب هالدور، والدور يلي عم بالعبو ببضاعة ناعمة كتير جدلي، فمطلق أي ممثل بحب الأدوار المش عادية وبحب يخاطر ممكن رجحو.
بنهاية حديثنا رالف شكراً على هالدردشة الحلوة ومبروك سلف مسرحية “بضاعة ناعمة” ناطرينا بفارغ الصبر، كل التوفيق الك ولفريق العمل.
مسرحية بضاعة ناعمة تاليف رالف معتوق اخراج مازن سعد الدين بطولة سمارة نهرا, رالف معتوق وفرح بيطار.
