كتب ايلي مكرزل في موقع JNews Lebanon
اليوم وقبل نهاية عام ٢٠٢٢ حبينا نختم السنة بدردشة سريعة مع الممثلة داليدا خليل يلي على الرغم من إنشغلا بتصوير مسلسلا الجديد خصتنا بهالحوار الممتع.
- داليدا خليل ببداية حديثنا خبرينا شوي عن مسلسل “شامبليون” وعن دورك تحديداً؟
شامبليون من المسلسلات يلي صورتا بالفترة الأخيرة، كتابة أحمد عثمان، إنتاج عراقي مصري، رح يكون hopefully على platform قريباً، بيتألف من ١٠ حلقات، بطولة جماعية من مصر سورية، العراق ولبنان.
وبيحكي عن عصابة بتحمي application إسما “شامبليون” من إنو تهدد العالم بالخطر أو من قصص سيئة وانشالله يا رب بس يحضره الجمهور يحبه.
رح إلعب دور شخصية إسما بلسم، شخصية حلوة كتير مركبة، فيا بين الرومانسية والقوة، فيا كتير من الجرأة وكمان بقلب الشخصية في عدة شخصية ما بدي كتير احكي عنا انشالله بس ينزل العمل بيلاقي النتيجة لي نحنا بدنا ياها.
- رسالة عتب وجهتيا للمنتجين اللبنانية من فترة وهيدي الرسالة كانت حديث الناس، وإنت مش أول ممثلة بتوجه هالرسالة، بنظرك شو السبب وليش هالتصرف من المنتجين؟
ما بدي احكي ايلي بالموضوع، قصة المنتجين والإنتاج اللبناني بعتقد إنو انتو بتعرفوا أكتر منا كلنا فالأفضل إنو ما بقى نحكي بالموضوع.
- في صداقات بالوسط الفني؟ ومع مين داليدا ع تواصل دايم؟
أكيد عندي زملا بالوسط وأصحاب مع كل العالم وبكل مسلسل بجتمع في منكون متل عيلة، ما في حدا معين.
أكيد رانيا عيسى من أكتر الأشخاص القراب على قلبي دايماً بشوفا، وبتجمعنا لقائات حتى برات التصوير والباقي كلن زملاء إلي.
- معقول نشوفك بعمل ضخم بيجمع التمثيل، الغناء والرقص ؟
أكيد… حلم عندي إني اقدر كون بعمل بيجمع الرقص والغناء والتمثيل مع بعض، انشالله بالايام يلي جاية بوجود إنتاج ضخم بيضوي على هيدا الموضوع وأنا أكيد جاهزة.
- قدمتي ٣ أغنيات: وردي وردي، شيك أوي وأغنية مودي عالي. أي أغنية الأقرب إلى قلب داليدا؟
الأغاني ال ٣ حلوين وكلن بعبروا عن الأمل، عن الفرح وعن الإيجابية وهيدا الموضوع يلي دايماً بحب ضوي عليه بكل الأعمال يلي أنا بطرحا.
- على أي عمل بتندم داليدا خليل؟
ولا عمل بندم عليه، كل عمل بتعلم منو، كل تجربة بعتبرا بتقدمني خطوي لقدام، ممكن في أعمال ما تلاقي رواج، ما تلاقي النتيجه عند العالم إذا بدك متل ما نحن بدنا، بس بالنهاية نحن كفريق منكون عم نشتغل، كممثلين منكون عم نتعب على فترة طويلة، منسعى حتى نقدم الأفضل.
بنهاية حديثنا شكر كبير للممثلة داليدا خليل، كل التوفيق بكل أعمالك وأكيد ناطرينك بل ٢٠٢٣.
