كتب ايلي مكرزل في موقع JNews Lebanon
دردشتنا اليوم مع نجم محبوب، من بداية مشوارو بالدراما اللبنانية، قدر يرسم لحالو خط مميز، بين الدراما اللبنانية للدراما المشتركة بديع أبو شقرا قدر يضل متميز، بكل دور وبكل مسلسل شارك في. وعلى الرغم من إنشغالو بهيدي الفترة، خاصةً مع نهاية العام خصنا بديع بدردشة سريعة.
- كيف بقيّم بديع أبو شقرا الدراما اللبنانية؟
بصراحة بهيدي الظروف، من المستحيل إنو الواحد يقدر يعمل تقييم للدراما اللبنانية، لأن البلد مش موجود كلو من أساسو، كيف بدو يكون في دراما موجودة. والدراما بتعتمد على الاشيا المحلية جداً وما عم يتّم توريدها للخارج، متل برا بي يصدر فيلم مثلاً بروح على الأوسكار وبينعرض بأوروبا وغيرو.
حتى مقومات الحياة بالبلد مش موجودة فإذاً ما فينا نعمل تقييم للدراما لأن بالوقت الحالي في مبادرات فردية ولكن ما في صناعة درامية.
- المشاركات العربية يلي عم نشهدا عالساحة بالمسلسلات لصالح مين بتصب؟ وهل بتشوفا منطقية؟
المشاركات العربية طبعاً بتصب لصالح الدراما عامةً، بتصب لصالح الممثلين يلي عم يشتغلو ويلي عم يقدرو يعملو إنتشار أوسع ويلي عم يقدرو يختلطو مع فنانين من الدول العربية لأن الفن متل ما بتعرف ما إلو جنسية، والإختلاط بفنانين من الدول العربية يقرب هيدا النوع من الثقافات المختلفة والطرق المختلفة بالشغل وبالأداء، هلأ بشوفا منطقية أو مش منطقية، هيدا ما فينا نعممو هيدا بكون إلو دخل بالعمل، في عمل بيبقى، في أحداث غير منطقية وفي عمل في أحداث منطقية لهيك ما فيك تعمم إذا منطقي أو مش منطقي.
- على أي عمل بيندم بديع أبو شقرا؟
ايه في أعمال ندمت عليا، بس ما فيي اذكرا لأن بكل صراحة ما في الواحد يشتغل بشغل ويرجع يسب في، فينا نعمل نقد موضوعي لبعض الأعمال إذا نسألت عنا، نقد علمي ايه، بس ما فيي سمي.
- شو الفرق بين الثنائية بينك وبين كارين رزقالله وبينك وبين كاريس بشار؟
الثنائية تختلف بقصة مقاربة الحكي عنا، مع كارين اشتغلت ٣ أو ٤ مسلسلات وكان التركيز الأساسي على قصتن، أما بمسلسل ستيلتو ما كان التركيز الأساسي بس على قصة خالد وألما، يعني ما فيك تعمل مقاربة، ولكن بين الممثلين مع كل ممثل أو ممثلة بتشتغل معو بثنائية، يمكن تكون ثنائية مش رجل وإمرأة يمكن بين رجلين، اخوي أصدقاء، كل ممثل بتشتغل معو، الممثلين بلاقو تقنياً طريقة حتى يصير في بيناتن ريتم وطبعاً هون بتبلش تنشأ العلاقة على الشاشة.
- عم منتابعك بمسلسل ستيلتو، هالعمل على الرغم من نسبة المشاهدات العالية عم يتعرض لحملة انتقادات هل بتشوف هالحملة محقة أو مفبركة؟
أنا بشوف إنو لما تنتقد عمل معين فني بدك تنتقدو بال categoryيلي هوي فيا، يعني ما فيك مثلاً تحضر مسلسل ستيلتو وتنتقدو بنفس النقد يلي بتوجهو لمسلسل الولادة من الخاصرة، هيدا بدك تتناولو بنقد على أساس ” soap opera ” طويل وهيداك بدك تتناولو على أساس هوي مسلسل سياسي. يعني كل مسلسل بدك تنتقد حسب ال target audience تبعو وحسب هوي شو نوعيتو، لهيك ببعض الأوقات بصير في إفراط بالنقد غير موجة.
- يقال إنو مساحة دورك بمسلسل ستيلتو منا كبيرة بس هي من أهم عناصر العمل شو رأيك بالموضوع؟
العمل بس ينعرض على الإنسان إذا حس في رح يشتغلو، إذا ما حس في ما بيشتغلو. طبعاً إذا ما بينطئس من حقو أو من اسمو كممثل وأنا وجدت إنو هيدا الدور ما إلو دخل بقصة كبير أو زغير، بالعكس إلو دخل بقصة قديش الدور يمتع الممثل وقديش بيقدر يعطي وقديش الدور بيقدر يعطي للممثل، هيك بفكر الممثل المحترف .
بنهاية حديثنا شكر كبير للممثل المبدع بديع أبو شقرا وكل التوفيق بكل خطوة وعمل.
