كتب إيلي مكرزل في موقع JNews Lebanon
تعودنا عليا بعفويتا واسلوبا الخاص المميز، وعلى الرغم من كثرة الصحافيين، المراسلين والاعلاميين، قدرت تكون مميزة ومختلفة عن الجميع. جويس عقيقي اليوم معنا بدردشة سريعة.
- اسمك كان من الأسماء البارزة ضمن ثورة ١٧ تشرين كتار قالو إنو بعض المواقف كانت مفتعلة للفت الأنظار شو تعليقك عالموضوع؟
كتار بقولوا وكتار رح يضلّوا يقولوا … مش مهمّ اللّي بينقال المهمّ إنّو ضميري مرتاح وكلّ شي واضح كان عالهوا ويلّي ما بيفهم بالصّحافة وبعمل المراسل الميداني أفضل ببعض الأحيان ما يعلّق ونحنا للأسف بزمن السّوشيال ميديا صار أيّ حدا بيحكي حيالله شي والكلّ بيلحقوا وبزقّفولوا.
- هل معقول نشوف وديع الشيخ أو سمير صفير ضيوف ضمن برنامجك “بصفتك مين”؟
برنامجي ضيوفوا معروفين مين ممكن يكونوا!
- جويس عقيقي رح إقلب الادوار وأطلب منك كلمة بصفتك الرئيس السابق “ميشال عون”
بصفتي الرّئيس السّابق العماد ميشال عون بدّي كون صريح مع شعبي وقلّو إنّي فشلت وإنّي جيت بشعارات فضفاضة ما طبّقتها وإنّو اللّي كان يقولو الجنرال عون بالرّابية ما نفّذو الرّئيس عون …
وإنّو أكيد أنا ما بتحمّل كلّ المسؤوليّات بسّ أنا واحد منّن “كلّن يعني كلّن” يلّي وصّلوا البلد للخراب!
- هل جويس عقيقي اخدت حقها ببرنامج “بصفتك مين”؟
برنامج “بصفتك مين؟” هوّي فكرتي وإعدادي وهوّي بالتّالي بمثابة الطّفل المدلّل عندي وبلّشت فيه عالإذاعة وأكيد آخدي حقّي فيه طالما إنّو بيشبهني وبيشبه المحطّة اللّي أنا فيها!
وهون بدّي إستغنم الفرصة لإشكر كلّ فريق العمل اللّي عم يشتغل من قلبو بالبرنامج من ال executive producer لارا لحد لل producer كارلا بجاني والمخرج فادي حداد والإعلامي عادل سميا يلّي انضمّ مؤخّراً لفريق العمل كمشارك في الإعداد وللفريق بكاملو!
- شو هي نقطة القوة ونقطة الضعف عند جويس عقيقي الإعلامية؟
نقطة قوّتي هيّي القوّة والجرأة وعدم الخوف وعدم الانتماء السّياسيّ لأيّ حزب في لبنان أمّا نقطة ضعفي فهيّي سرعة انفعالي ربّما!
- هل برأيك الإعلامي والمراسل بشكل خاص بيفقد مصداقيتو إذا أعلن عن انتماء سياسي لحزب معين؟
ما بقول بيفقد مصداقيّتو بسّ بصير صعب كتير عليه يشتغل كمراسل عالأرض وهالأمر يكبّلو بشكل مباشر أو غير مباشر وبصراحة أنا ما بحبّذ هالشّي!
بنهاية حديثنا كل التوفيق والنجاح إلك جويس عقيقي إنت شخص مميز للحديث معك تتمي. كل الحب!
