كتب إيلي مكرزل في موقع Jnews Lebanon
دردشتنا لليوم مع كاتبة، قدرت تكون حديث الناس بأسلوبا وطريقتا المميزة. سلسلة ناجحة كتيرة. وبمجرد الحديث معا بتقدر تكتشف قديش هي شخص متواضع وقريب للناس. حبينا نشوف مع الكتابة نادين جابر كيف التحضيرات لمسلسل للموت ٣ ونتعرف على أجدد أعمالا.
– نادين طمنينا عنك؟ وكيف التحضير لا للموت ٣؟
أنا منيحة الحمدلله، تعب وضغط نفسي كتير لأن بعدني بطور الكتابة والتصوير بلش بمسلسل للموت، التحضيرات حلوة بس متعبة بنفس الوقت فريق العمل هلأ عم بصور بتونس وقريباً منكفي تصوير بلبنان.
-قديش بتعتبريا مخاطرة بتقديم جزء ثالث من للموت بعد نجاح الجزئين الأول والثاني؟
أكيد تقديم جزء ثالث من مسلسل في مخاطرة، طبعاً لما يكون الجزء يلي قبلو واللي قبلو نجح، بصير في تخوف كتير كبير إنو شو بعد بدنا نعمل، ويلي نحنا مآمنين في إنو نحنا كفريق عمل ما عملنا جزء ثالث لأن طلب منا، أكيد يطلب منك تزيد جزء جديد لما يكون المسلسل ناجح، من بعدا أنا ككاتبة ما فيي وافق على كتابة جزء إذا أنا مني مأكدي إنو عندي بعد شي قولو، أنا مني من الأشخاص يلي ضد الأجزاء انشالله تكون مليون جزء، طالما الكاتب بعد عندو شي يقولو والحتوتة بعد ما خلصت.
أخدت وقتي حتى فكر بحبكة للجزء الثالث، فكرت كتير عملت brain storming، عملت معالجة درامية للمسلسل كلو قبل ما بلش، لحتى نشوف كلنا قدام عيونا إنو إذا عنا مسلسل يضاهي قوة يلي قبلو والله لأ وعلى هيدا الأساس نحنا خاطرنا نعمل جزء ثالث.
– شو يلي رح يميز الجزء الثالث عن الاجزاء السابقة؟
يلي بميز الجزء الثالث بعتقد إنو هوي متصل ومنفصل عن الأجزاء السابقة. الشخصيات يلي حبينا الناس ومعلقين فيا بعدن موجودين بس ضمن أرضية جديدة وحبكة جديدة وظروف جديدة كأنو مسلسل جديد
بنفس الشخصيات، ما عم نعيد حالنا مثلاً الجزء الثاني كان عبارة عن الإنتقام. ما رح نعمل الجزء الثالث كمان إنتقام. في شي جديد، في قصة جديدة، في شخصيات جديدة هيدا الشي يلي رح يميزو لأن رح نشوف شي
ما شفنا قبل من جميع النواحي.
– شو سبب عدم كتابتك للجزء الثاني من مسلسل صالون زهرة مع العلم إنو الجزء الأول من كتابتك حقق نسبية مشاهدة عالية؟
مش ضرورة إنو الكاتب إذا كتب جزء من مسلسل معين يكفي بكل الأجزاء، برا في كتاب بيكتبو بنفس المسلسل كل كاتب حلقة وكل مخرج بأخراج حلقة، مش بالضرورة اني أنا أو حدا غير يكتب كل أجزاء مسلسل مثلاً الهيبة أول حزء كان حدا ثاني جزء كان حدا الثالث كان حدا مش بالضرورة يعني نفس الكاتب.
– عم منتابع كتير أعمال تركية عم تنعمل باللغة العربية على سبيل المثال ( Stiletto عالحلوة والمرة وغيرون) شو رأيك بهالموجة وهل إنت كنادين جابر معا؟
الأعمال التركية يلي عم تتعرب هي نوع من أنواع الدراما يلي بتتقدم بالعالم كلو، يعني حتى مسلسلات أميركية بتترجم للتركي متل Desperate Housewives عملولو نسخة تركية، عروس بيروت أنا كنت أول مين فتت فيا لهيدي الموجة كان عروس إسطنبول، أنا مني ضد هالفكرة ليش لأ هيدا نوع درامي متواجد عالمياً ويعتبرو من المسلسلات الطويلة المسلية.
– هل رح نشوف قريباً أعمال غير للموت للكاتبة نادين جابر؟
انشالله من بعد للموت، هلأ تقريباً بدي شي شهر كتابة بعد أو شهر وشوي، من بعدو عندي رياحة ومن بعدو عندي مسلسل قصير، رح بلش في بيرجع من بعدا منبلش تحضيرات رمضان ٢٠٢٤
شكر كبير إليك نادين جابر وأكيد كلنا ناطرين بحماس الجزء الثالث من للموت برمضان ٢٠٢٣ كل الحب والتوفيق.
تعليقان
تنبيه: خاص- رندة كعدي بين بيت من أحلى بيوت راس بيروت وللموت ٣ قصة إلتزام وحب – JNews Lebanon
تنبيه: ندين جابر تكشف أسباب غياب محمد الأحمد وباسم مغنية عن "للموت 3" -