كتب ايلي مكرزل في JNews Lebanon
دردشتنا لليوم مع زعيمة الكوميديا، مع ممثلة محبوبة من الكبار والصغار وقد ما قول إنو لا يمل من الحديث معا صدقوني. صحيح الدردشة كانت سريعة … بس عنجد كتير حلوة.
– ليليان نمري إسم عليه إجماع عند الكبار والصغار، شو سر هالمحبة ليليان؟
أنا ما فيي لخص موضوع المحبة، هيدي نعمة من الله، الفنان يلي عندو كاريزما وقبول من الناس بدو يكون في إجماع عالمحبة، الحمدلله، يكتر خير الله وأنا هيدي بعتبرا نعمة من الله.
– تابعناكي برمضان 2021 بمسلسل للموت ٢ بدور زعيمة، هل رح تكوني موجودة بللموت ٣ ؟
للصراحة بعد ما في تأكيد إذا أنا رح كون بالجزء الثالث أو لأ .
– عام ٢٠٢٢ حصلتي على عدد كبير من التكريمات عن مجمل أعمالك وعلى مسيرتك الحافلة بالنجاحات، شو بيعنيلك التكريم وقديش مهم للفنان؟
دايماً التكريم بيعني للفنان مش إنو بيعطي طاقة أو دعم متل ما الناس بقولو لأ، لأن في مهرجانات بتصير بلبنان مهمة كتير كل الفنانين بالعالم العربي بيتمنو إنو يجوا يستلموا جائزة منها.
كتير سئيل إنو يكون في فنانين لبنانية معروفين بجمهورن وبلدن وشعبن ما يكونوا عم يتكرموا قدام هالأعمال بالعالم العربي، لهيك في ناس بيستغربوا إذا مرق مهرجان ما تكرمت، إنو ليه ما تكرمتي؟ كان لازم تتكرمي.
بتعرف يا ايلي محبة الناس، بس أنا بالنسبي إلي لليوم تقريباً حصدت فوق الـ ٨٥ تكريم ما بعتقد إنو في ممثلة بالعالم العربي حصلت على هالعدد من التكريمات، إنو ٨٥ مرة مكرمة بحياتي من تقريباً من ٢٥ سنة لليوم.
الحمدلله، أنا ما بطمح دايماً إنو بس بالمهرجانات إتكرم، أنا كتير بفتخر اني تكرمت بالجامعات، المدارس، الجمعيات، وزارات أنا مكرمة من كل نماذج المجتمع وهيدا بالنسبي إلي أكبر تكريم ومحبة الناس إلي هي أكبر تكريم
أنا لما بمشي عالطريق وحدا بقلي منحسك من عيلتنا هيدا أكبر تكريم، بس هي قصة المهرجانات إعطاء قيمة لشخص صرلو سنين بمثل، وبقدم عطاءات كبيرة تانية.
– معقول نشوفك عم بتجسدي قصة حياة والدتك الرحلة “عليا نمري”؟
لأ ما بعتقد إنو يوم من الايام رح جسد قصة حياة “عليا” مع إنو كتير بحب وبتمنى، بس أنا حلمي ما بعرف إذا الله عطاني عمر حقق حلم عليا اني إلعب دور ستي “ساره”، امي مخبرتني قصة ستي كلا.
بس بتعرف ايلي منتجين اليوم ما بهمن، إذا أنا بدي روح قول لمنتج أنا عندي قصة فيلم سينما أو مسلسل حابي جسد قصة ستي “ساره” ما رح يهتم لهيدا الموضوع، وللاسف أنا مني منتجي حتى اقدر أنتج، بس بتمنى إنو حدا يطلب مني إنو كون بحقبة ايام الاتراك، ويقلي بدنا ياكي تكوني معنا وتنكتب شخصية ستي بالمسلسل وإلعبا أنا، أنا فكرت كذا مرة إنو فيي إكتب القصة كلا بسهولة بس المشكلة إنو يمكن أنا ما لاقي إنتاج، فأنا حابي قبل ما اكبر أكتر من هيك لأن ستي بلشت قصتا بالاربعينات بلشت القصة الجدية للإمرأة المكافحة من الأربعين فنشالله اقدر حقق حلمي وحلم امي.
– شو يلي اختلف بليليان نمري من ايام “عفو” بالمعلمة والاستاذ لدور زعيمة بـ للموت ؟
أكيد إختلف كتير قصص من المعلمة والأستاذ للموت طبعاً ، بس المهم إنو أنا حافظت على العفوية يلي عندي، بس إنو في كتير قصص بتتغير بصير في عندك قدرات أكتر، خبرة أكتر بتقدر تتكيف أكتر مع الكاميرا تتكيف مع كل مخرج جديد بدك تتعامل معو لأن كل مخرج عندو أسلوب معين بتصير تعرف أكتر كيف بدك تربط الشخصية، أكيد إختلف كتير كتير.
في أدوار كتير عنجد مش غرور بكل تواضع، في أدوار الناس مؤخراً شافوا إنو كتير مهمة بس بعتبرا كتير سهلة، يعني ما بقى في دور بحسو صعب عليي لأن بشتغل عليه، لهيك لما بتشوف الناس بقولوا مش معقول الدور يلي بتلعبو بتلبسو لبس وفي أشخاص بينعطاهن مجال لأدوار رائعة جديدة ما بيتركوا ولا بصمي لأن ما بيشتغلوا على حالن.
والفنان بس يكبر ويمرق عليه ٢٠ سنة بس يقول أنا شو ما عملت الناس رح تتقبل هون بكون فشل فشل ذريع، الممثل لازم يضل يشتغل على حالو لأخر دقيق من عمرو.
ما في يقول أنا خلص اشتهرت وأطلع سمع، يشتغل بس كرمال المصاري الناس بتلاحظ والجمهور مش غبي أبداً أبداً صار بلاحظ وبيعرف إنو هيدا الممثل خلص ما بقى إلو جلادي.
الممثل القبضاي بضل يجتهد لأخر دقيقة وبكل عمل يترك بصمته هيدا أهم شي بمسيرة الفنان. وأنا بالنسبي إلي النجومية هيي الإستمرارية. هيدي هيي النجومية.
شكر كبير للرائعة القديرة ليليان نمري على هالدردشي الحلوة وأكيد ناطرينك بأعمال ونجاحات جديدة
كل الحب مني أنا ايلي مكرزل ومن موقع JNews Lebanon.
