كتب إيلي مكرزل في موقع JNews Lebanon
على الرغم من انشغالاتا الكتيرة خصتنا الإعلامية المتألقة ديانا فاخوري بهالدردشة السريعة والمميزة بكل صراحة وعفوية متل ما عودتنا دايماً .
- يقال إنو ديانا فاخوري هي الطفلة المدللة بقناة ال MTV شو تعليقك على الموضوع؟
مدللة؟ يمكن بس مش كتير، إجمالاً أنا بعدني من القداما يلي طلعو بأول نشرة أخبار وأساسو إذا بدك صار ” Logo MTV ” بالأخبار. فطبيعة يعني يكون إلي محبة أو معزة أكتر بالتعاطي غير عن كل الجيل الجديد يلي أنا واكبتو كلو بس ما بعتبرو دلال بعتبرو … يعني عيلة أنا صرت جزء منا لحكم السنين يلي مرات والعطاء يلي قدمتو فيا والتطور يلي عشتو معن.
- بلا دبلوماسية وبصراحة مين من الاعلاميات بنافس ديانا فاخوري؟
بالنسبي للمنافسة أنا ما بشوف حدا بنافس حداً إلا ما يكون بنفس ال Level وبنفس الخبرة وبنفس الشهادات وحتى العمر بالمهني. فاليوم عالساحة متل ما قلتلك صار في جيل جديد بالأخبار بعد أجدد من جيلي، فما بشوف من مذيعات الأخبار في حداً ممكن فوت معو أنا بمنافسة، وصلنا لمرحلة صار في كتير مذيعات، ويمكن المؤهلات منا متل ما كانو يعتمدو عليا قبل بإختيار مذيعات الأخبار تحديداً، كرمال هيك أنا بالنسبي إلي أنا بنافس حالي.
- أي برنامج بتقول ديانا يا ريت هالبرنامج كان إلي كنت كسرت الدني؟
برنامج إنو أنا قول لو كان إلي أكيد ما في، إنو أنا عندي برنامجي الخاص وهيدا هوي البرنامج يلي كنت بحب أعملو وحققتو على صوت بيروت وانعرض على ال MTVوهيدا هوي يلي أنا حسيت إنو بيليق فيي ويلي ما شفتو بي ولا محطة.
بالعكس جربو هلأ يقلدو كلن، هيدا هوي البرنامج الوحيد لي أنا بحس إنو كان إلي وبيلبقلي ونطرت كتير وما عملت برامج قبل حتى أعمل شي بيشبهني وراقي ومحترم.
- بين جبران باسيل، ستريدا جعجع وميشال معوض مين بتختار ديانا فاخوري لرئاسة الجمهورية؟
من الأسماء يلي طرحتا ولا واحد، ولا واحد لأن كل واحد محسوب على حداً، طبعاً بفضل رئيس يكون وطني أكتر، يكون ما عندو مصالح، جبران أكيد لأ، ستريدا جعجع طبعّا لأ لأن رئيسا حزب وما بدنا نكرر نفس المشكلة، ميشال عون كان رئيس حزب وما كان رئيس لكل لبنان. أما ميشال معوض مع احترامي إلو ومحبتي ما بعرف قديش هوي لأن مرشح من بعض الاحزاب ممكن يكون توافقي، قديش رح يخلو يحقق يلي هلأ نحنا طامحين إنو نحققو وقديش عندو علاقات مع الخارج حتى يقدر يساعد أو يختار رئيس حكومة، يتفق هوي وياه حتى يعملو نقلة نوعية بهالظرف البشع يلي نحنا بحاجة لتهديم للطبقة كلا ويرجع يجي New generation يصلحو كل الأخطاء يلي ارتكبوا لأن إذا رجعوا اجو نفس الأشخاص يلي مارسوا السياسة قبل مع سياساتن الغلط بعتقد رح نضل محلنا.
- وين ديانا فاخوري عندا حرية أكتر بال MTV أو بصوت بيروت؟
حريتي بصوت بيروت أكتر، مش لأن ال MTV ما بقدر كون حرة، طبيعة كتليفزيون بيفرض شروط كوني موظفي لازم التزم بشروطو وقوانينو، بينما بصوت بيروت أنا مسؤولة، بموقع مسؤول، مني موظفي، بحس بهامش أكتر من الحرية كوني بالإدارة وكمان هني ما عندن شروط أو قوانين بيفرضوا على كل الأشخاص يلي بيتعاملو معن.
ديانا بدي إتشكرك على هالحوار الحلو والمميز وأكيد كل التوفيق إليك بكل خطوتك.
