كتب ايلي مكرزل في موقع JNews Lebanon
مع إنطلاق عرض فيلم “Weekend” بالصالات السينمائية كان النا دردشة سريعة مع نجمة العمل الفنانة شيراز حتى تخبرنا أكتر عن الفيلم وعن دورا تحديداً وأكيد خلال هالدردشة طرقنا لمواضيع عديدة.
- شيراز ألف مبروك إنطلاق عرض فيلم “Weekend” بالصالات اللبنانية، خبرينا شوي عن دورك؟
مرسي ايلي الله يبارك فيك، دوري هوي جوانا، جوانا بنت كتير “Cute”وأنا بكون بنت كارلا بطرس، بيجمعنا بالغلط علاقة بفؤاد يمين بطريقة غير مباشرة، وهيك بتمشي أحدث الفيلم. جوانا بنت كتير أهلا مدللينا وهيدا ستيلا.
- شو يلي إختلف بشيراز بين موت أميرة وفيلم “Weekend” ؟
التجربتين كتير مختلفين عن بعض، المسلسل والدراما ما بيبشهو أبداً فيلم السينما و “Romantic comedy” بعاد كتير عن بعض بس ما في شك إنو تنيناتن بدن مجهود خاص، تعب وتركيز وحسيت إنو أكتر بال Romantic comedy”” بدك تكون على طبيعتك بطريقة خفيفة، لأن إذا بطريقة مصطنعة العالم ما بتستهضمك، هيدا النوع كتير دقيق مش كل العالم رح تقبلو منك إذا عنجد ما كنت كتير على طبيعتك.
- بموت أميرة كان معك أسماء كبيرة وحالياً عم بتمثلي مع كارلا بطرس وفؤاد يمين مع مين بتحب شيراز تمثل بالمستقبل؟
ما بقدر صراحة ايلي سمي إسم معين لأن في كتير ممثلين بحب إنو إشتغل معن، إكسب من خبرتن، هني من الأساس ممثلين، أنا بالنتيجة مغنية وفتت على عالم التمثيل موخراً، بتمنى اني إشتغل مع ممثلين كبار يلي سبق تعاملت ويلي بعد ما تعاملت معن.
- رح إرجع معك شوي للماضي وتحديداً أغنية “كيف بدك عني تغيب” هل توقعتي نجاح هالغنية وإنو تحقق كل هالانتشار؟
صراحة إيه كنت متوقعة نجاح هالغنية، لأن أنا سبق وسمعتا لاهلي ورفقاتي ولزغار وكبار حتى شوف شو اراءن وكانوا من كل الاعمار عم بحبوا كتير وعم بقولولي “شيراز واو الغنية”، لهيك كنت متأكدي وتعبت عليا كتير كفيديو كليب وتوزيع وصوت، اشتغلت عليا كتير من كل قلبي وتوقعت هيك نجاح صراحة.
- منافسة قوية عم تشهدا الساحة الفنية مين بنافس شيراز؟
ما بعرف إذا بنافس حدا أو لأ، أنا متل ما بتعرف عندي موسيقي الخاصة، ستيل الخاص من الأغاني يلي أنا بقدمو ويلي حمدلله نجحت في والعالم حبوني في.
- شو عم بتحضير شيراز أعمال جديدة؟
هلأ شاغلة على ٣ أعمال جديدة، بينزلو انشالله ورا بعض قريباً من بعد الفيلم بفترة عم حضرلون حملة إعلانية بالدور لكل عمل بعملو وانشالله يا رب العالم تحبن وأنا أكيدة العالم رح تحبن، في منن من ستيلي وفي منن ستيل جديد رح كون عم غني بين لبناني ومصري.
كل التوفيق شيراز بكل أعمالك ونشالله من نجاح لنجاح أكيد نحن بإنتظار كل شي جديد وحلو منك.
