كتب ايلي مكرزل في موقع JNews Lebanon
بظل كل الأزمات يلي عم نمرق فيا، بظل المرحلة الدقيقة يلي عم تعصف بلبنان، بضل الفن هوي المنفذ الوحيد، وبضل الأمل ينبع من الأغاني، المسلسلات ومن الأفلام.
قبل إنطلاق عرض فيلم “Weekend” بالصالات السينمائية حبينا نعمل دردشة سريعة مع بطلة العمل كارلا بطرس.
- كارلا بطرس بالبداية مبروك فيلم “Weekend”، خبرينا شوي عن الفيلم؟
مرسي كتير ايلي، فيلم “Weekend” تصور تقريباً وقت الثورة، وللأسف ما قدرنا نعرضو مع الكورونا وكل المشاكل، فا اليوم عم ينزل بالسينما، فيلم عائلي مهضوم “Love Story” كوميدي. أنا بحب هالكوميدي، العيلة كلا بتكون مجموعة وتروح تحضروا، حلوة هيدي الculture، إنو بعدا كل العيلة بتروح بتحضر “Movie”، حبيت المشاركة بهالعمل وبنتي هي الفنانة شيراز، بطولة فؤاد يمين متل ما صرتو بتعرفو علاقة حلوة مهضومة فيا مواقف حقيقية وطريفة و un peu de tout، والفيلم من إنتاج day 2 pictures وإخراج سامي كوجان.
- بنظرك كارلا قديش السينما تأثرت بظل كل الظروف يلي عم يمرق فيا لبنان؟
أكيد السينما كتير تأثرت، ومن أكتر القطاعات كمان، البلد كلو تأثر، الكوكب كلو تأثر، أولاً من كورونا وتانياً الثورة، فينا نقول اختفى هيدا المجال طبعاً سكرت الصالات فترة طويلة، وما بدنا ننسى إنو المنتجين كانوا حاطين أموال مش مزحة وصارت الأزمة، حطوا الأموال وما ربحوا منا وما قدروا يشغلوا أفلامن هيدا الشي كتير صعب.
- الساحة التمثلية عم تشهد خلافات كبيرة بين النجمات، شو تعليقك عالموضوع؟
ما كتير بتطلع على الخلافات لأن أنا انسانة مش رح قول اني مسالمة، بس ما بحب هيدي الاشيا، خاصةً القيل والقال على السوشيل ميديا، هيدا مش نحنا، نحنا ناس أرقى من هيك، إذا عنا مشكلة منحلا بتليفون. أنا هيك إذا صار معي شي بحلو بهيدي الطريقة، نحنا ناس متل ما قلت أحسن من هيك مثقفين أحسن من هيك متربين. بتمنى إنو ما بقى نشوف من هيدي الاشيا لأن ما بتواصلنا لمطرح. هيي بتعمل فتنة زيادة، نحنا دعاة كلمة كبيرة، نحنا ناس منطل على العالم ومنحاول نعطين فن راقي حلو، تلفزيون لذيذ، مسلسلات حلوة، أدوار جميلة، تأثير فين، يحضرون يتابعونا، الكل بحقلو يكون موجود على الساحة، في ناس بتنجح وفي أوقات اعمال بتنجح، في ممثلات ببينو أكتر بهيدا الدور لعدة ظروف، يعني ما بحب هيدي الاشيا كلا أنا، كتير بعيدة عنا. قدموا فن، قدموا يلي بتقدروا عليه، كل وحدي حسب ظروفا، حسب طاقاتا والناس هي بتحضر بتحب ما بتحب حرّين.
- شو عم بتابعي مسلسلات خلال شهر رمضان الكريم؟
للحقيقة، حتى كون كتير واضحة ما عم بحضر أبداً مسلسلات، بفضل أنا على رواق بعدين تابع بحب شوف زملائي شو عم بقدموا بس برجع بحضر على رواق لأن بتصير تسمع أراء مختلفة فايتي ببعضا ما بحب اتأثر فين.
بعد العيد بحضر على رواق وبهني زملائي أكيد.
- بعد فيلم “Weekend” شو عم بتحضير كارلا بطرس؟
بعد الفيلم، “حياة لا تشبهني” دراما خليجية صورت بالكويت، لأول مرة أنا بفوت بالدراما الخليجية، حبيت كتير التجربة والخبرة، نجوم كبار معي، وعم إلعب دور إمرأة لبنانية، المسلسل إنتاج عادل اليحيا، إخراج وتمثيل عبدالله التركماني.
كارلا بطرس شكراً على هالدردشة الحلوة، مبروك فيلم Weekendوأكيد ناطرينك بالدراما الخليجية قريباً كل التوفيق.
