كتب ايلي مكرزل في موقع JNews Lebanon
خلال عرض مسرحية بضاعة ناعمة للكاتب والممثل رالف معتوق كان النا دردشة سريعة مع بطلة العمل الممثلة فرح بيطار حتى نحكي عن دورا بالمسرحية وعن كتير مواضيع تانية.
• فرح بيطار أول شي مبروك انطلاق عرض مسرحية بضاعة ناعمة، خبرينا شوي عن دورك بالمسرحية؟
مرسي كتير ايلي نشالله المسرحية تكون عجبتك. المسرحية بتحكي عن ثلاث نماذج أشخاص عندن عقد معينة “psychological echoes” صارت معن بحياتن وخلتن يوصلو ليلي وصلولوا. أنا بالنسبي إلي كاركتاري هوي سلمى بنت بالثلاثين من عمرا، وسلمى بمرحلة بحياتا قطعت بمشكلة خلتا إنو يصير عندا عقدي بمحل معين ما كتير ايلي راح احكي أو أفضح الموضوع وأنا أكيد إنو في كتير “audience” لما يكونوا عم يحضروا المسرحية رح يلاقوا حالن قادرين يعملوا “relation” مع كذا شخصية بالعمل إن كان معي أنا ولا مع رالف ولا مع سمارة، وكل ما يقطع شوي من المسرحية كل ما الجمهور يكتشف أكتر شخصية كل حدا فينا وعن المشكلة وليش وكيف وصلو لهون.
• المسرحية فيا جرأة، إن كان من خلال طرح الموضوع أو من خلال النص، قديش هالموضوع خلاكي تفكري قبل الموافقة على العمل؟
صراحة أنا برأيي إنو المسرح عطول هوي باب حتى نجن في أكتر، حتى نحكي الحقايق متل ما هي أكتر، حتى إذا بدك ما يكون في حدود للاشيا أكتر بكتير من التليفزيون أو حتى السينما. بالعكس أنا لما قريت النص انغرمت في، انغرمت قديش حقيقي، الفكرة تبع المسرحية والنص بتعيش كتير، هي منا بس لحقبة معينة أو إنو بعد عشر سنين ما فيا تكون عم تنطرح، المسرحية والموضوع يلي عم تطرحو كتير لمسوني، وبعتقد ايلي من حكي العالم عم تلمس كتير أشخاص بالمجتمع، وانا برأيي، أو إذا بدي قلك الحقيقة النص كان هوي يلي عم بشرقطلي عيوني وعم بخليني قول دغري ايه على العمل.
• ما بتعتبري إنو طرح عمل مسرحي بهالظروف هي مخاطرة شوي؟
أنا برأيي بهيدا الوضع يلي عم نقطع في ما في شي مش مخاطرة، الشي الوحيد يلي مش مخاطرة هوي إنو نقعد بالبيت ونسكر الباب ع حالنا. بس نحن أبداً شعب مش هيك، بعتقد مع كل الظروف يلي قطعنا فيا ويلي عم نقطع فيا، هيدا شي صار كتير واضح وصريح. نحنا عطول منجرب قد ما فينا نخلق فرص من لا شيء، وهيدا الشي يلي صراحة رالف عملو، وأنا بعتقد إنو هيدي جرأة كبيرة وصدقني ما ندمنا، بالعكس كمية العالم يلي عم تحضر، يلي عم بتحب، يلي عم تعطي رأيا شي كتير حلو وكتير كبير، مخاطرة عنجد ايه، ما في شي بقى بهالبلد مش “risky” ومش مخاطرة بس أكيد بمحلا.
• من مسلسل “وين كنتي” لمسرحية “بضاعة ناعمة” شو يلي إختلف بفرح بيطار؟
مسلسل وين كنتي كان أول عمل درامي إلي، من بعد قربت تنحل، أنا بلشت بقربت تنحل ومسرح الشانسونيه، في فرق خبرة كتير كبيرة بين هلق وقبل، أكيد الموهبة كتير مهمة وبتكون مبينة وين ما كان وكيف ما كان، بس هي الموهبة قديش بتمرّنا وقديش بيقطع عليا سنين مع أدوار مختلفة، مع عالم بتتعرف علين
بيلفتولك نظرك لاشيا ما كنت إنت منتبهلا، هني هول يلي بيفرقوا، هول يلي بغيروا، هول يلي بخلوا الموهبة تتبلور. فا بين فرح الممثلة بمسرحية “بضاعة ناعمة” وبـ”وين كنتي” في سنين من الخبرة وسنين من الدرس وأكيد سنين من النقد الذاتي أكيد في فرق كتير كبير.
• اشتغلتي سينما (فيلم فيتامين عام ٢٠١٤) وعدد من المسلسلات منذكر منا وين كنتي، تانغو، إم البنات والغربة وحالياً عم تشتغلي مسرح. بالنسبة الك شو يلي بميّز كل تجربة ووين بتلاقي حالك أكتر؟
أنا برأيي كل عمل وهيدا بصراحة من أول ما بلشت بمجال التمثيل هيدا الشي كتير بحرص عليه إنو ولا مرة يكون في دور، عم أدي أو عم بقبل في، يكون مش عم بزيد شي إن كان عليي كشخص أو عليي كممثلة، وإجمالاً هيدي هي الطريقة يلي بستعملا إذا ما كانت الطريقة الوحيدة حتى إختار فيا أدواري. كل دور منن عندو محل بقلبي، كل دور منن عرفني على إحساس معين ما كنت حاستو من قبل. المسرح أنا برأيي هوي الإمتحان الأكبر للممثل لأن بالمسرح ردة فعل العالم الحقيقية، ردة الفعل المباشرة، بالمسرح الممثل بيتعرى بفرجي كل طاقاتو أو بفرجي كل ضعفو، فا وين بلاقي حالي أكتر؟ هي سينما، هي تليفزيون وهي مسرح، هي وين الدور يلي مشتاقة إلعبو وين الإحساس يلي إشتقتلو أو متعطشي إلو، ما بقدر فرق بيناتن بس أكيد المسرح هوي الإمتحان الأصعب والأكيد كمان إنو ما في ممثل ما بيتمنى لمرة إنو يكون واقف على خشبة المسرح .
• من بعد بضاعة ناعمة شو عم بتحضر فرح؟
من بعد بضاعة ناعمة الأكيد إنو رح كتر من اطلالات المسرحية، وبالنسبة للمسلسلات عم بقرا كذا نص بس بعد ما في شي نهائي حتى احكي عنو وفي مسلسل قريباً رح يطلع عالهوا سبق وتصور تحت عنوان “روح” مسلسل قصير من ٩ حلقات مع ” Day Two Pictures”، إخراج سامي كوجان، بطولة محمد عطيه، كارين رزقالله، ندى أكرم، بكري خالد، مجدي مشموشي، جوليا قصار. كمان كتير مبسوطة وناطرة هيدا العمل حتى يطلع عم بلعب في دور طبيبة وناطرة شوف ردة فعل العالم عليه.
فرح بيطار شكراً على هالدردشة الكتير حلوة وأكيد النا لقاء تاني معك، كل التوفيق بكل أعمالك وناطرين كل شي جديد منك.
الجدير بالذكر، إنو مسرحية بضاعة ناعمة تأليف رالف معتوق اخراج مازن سعد الدين بطولة سمارة نهرا, رالف معتوق وفرح بيطار.
