كتب إيلي مكرزل في موقع JNews Lebanon
دردشتنا اليوم مع شاعر مبدع قدر يتميز بأسلوب مختلف عن كل شعراء الأغنية.
من كرهني، كلنا مننجر، أزمة ثقة، نسخة منك، حدا تاني وكتير من النجاحات مع نجوم الوطن العربي حديثنا مع المبدع علي المولى.
- ببداية حديثنا بدي قلك مبروك اغنية “ما تندم ع شي” للنجمة اليسا، الأغنية عم بتحقق نجاح وانتشار واسع خبرنا شوي عن سلسلة النجاحات بينك وبين اليسا؟
شكراً الك، العمل مع اليسا في عندو طابع خاص، و خصوصاً انو مش اي عمل بيقنعا، فهيدا بضيف مسؤولية على صناع الاغنية، و النجاح اوقات بخوّف صاحبو لأنو الأصعب منو المحافظة علي و الاستمرار في، بلشنا بكرهني و هلق “ما تندم عشي” فانشالله تلاقي النجاح اللي بتستحقو
- غير اغنية “ما تندم ع شي” كم عمل رح يجمعكن بالالبوم الجديد؟
بالالبوم في عمل المفروض، بس بعد ما نهينا موضوعو…
- بعض الأشخاص بيعتبرو كلمات علي المولى مبالغ فيا بعض الشيء وفيا نوع من الفلسفة شو تعليقك عالموضوع؟
الحياة وجهة نظر، وانا بحترم رأي الجميع عالأكيد، المبالغة يعني انو تعطي الشي اكبر من حجمو، و هيدا بعيد عن اسلوبي لأني اقرب الى الواقع بكتاباتي، بينما الفلسفة هي تطرح اشكالية مختلفة او تعريف جديد لموضوع معيّن، متل الحب منو عشرة، اكتر ناس عرفو الصح هني اللي عملو غلط، يا بتفكر يا بتحس … و هيدا نمط انا شخصياً بعتمدو بكتاباتي.
- بدي احكي عن اغنية انا شخصياً كتير بتعنيلي “مريض نفسي” موضوع بهالجرئة والقوة قديش صعب على الجمهور يتقبلو؟
عفكرة أغلب البشر مرضى نفسيين بس في منن ما راحو عند طبيب نفسي بعد او ما تشخصو، ما في حدا سليم نفسياً بالمطلق، هيدي الغنية هي الاقرب لالي ، لأني عم بحكي فيها عني و عن معاناة معيّنة عشتا، وخصوصاً انو هالموضوع يعتبر تابو عند البعض و في تعتيم عليه، يعني الاغاني منا دايما للتسلية اوقات بتكون قضية
- عام ٢٠٢٢ تم تكريمك تحت عنوان فيلسوف الشعر قديش بيعنيلك التكريم؟
يعني ببلدنا عادةً بيتكرم الفنان من بعد رحيله، ففكرة اني تكرمت من وزارة الثقافة بهالعمر ، كبرلي قلبي طبعاً و حملني مسؤولية اكبر، وانشالله اقدر كون قدا
- علي بدي منك اسم شاعر واحد من جيلك كلمات اغاني بيلفتولك نظرك؟
مازن ضاهر
- هل للشاعر أو الكاتب وقت معين او فترة زمنية معينة؟
لأن منلاحظ انو بعض الشعراء بيعملو أغاني بينتشر اسمن وبعد فترة بيختفو أو بصير انتشار اعمالن ووهجا قليل، هيدا الشي مربوط بشغلك عنفسك، انك تجرب ما توقع بفخ التكرار و لا تستهلك مخزونك الفكري وتعتمد بس عاللي بتعرفو، الشاعر او الفنان ليحمي وجودو لازم يضل يطور من نفسو و يتعلّم اشيا جديدة ويواكب الاجيال الجديدة اللي طريقة تفكيرا مختلفة، و هيدا اللي عم جرب اعملو.
بنهاية حديثنا شكرا الك علي عالمقابلة الأكثر من رائعة إنت مش بس مبدع بكلماتك كمان بأخلاقك وأسلوبك مني ومن موقع JNews Lebanon كل التوفيق والنجاح بانتظار كل أعمالك الجديدة.
