كتب إيلي مكرزل في موقع JNews Lebanon
بعز إنشغالا بتصوير دورا بمسلسل للموت ٣ بتونس، خصت النجمة ورد الخال موقع JNews Lebanon بهالدردشة السريعة وكشفت خلالا عن تفاصيل كثيرة من كواليس العمل.
- ورد الخال، طمنينا عنك بظل هالظروف يلي عم يمرق فيا لبنان؟
أنا متلي متل كل هالناس يعني الظروف يلي عم نمرق فيا كلنا، عم تمرق علينا نفس الشي. يعني كلنا محبطين من وضعنا وفاقدين الأمل بكتير من المحلات وأنا متلي متل كل هالناس بحس بنفس الشي، وعم عاني متلن هيدا يلي بقدر قولو، حتى يمكن نحنا منق أكتر لأن بينسمع صوتنا أكتر، بس الفنان ما في يعمل أكتر لأنو الشغل مطلوب من المسؤولين.
- الإعلان عن مشاركتك ببطولة مسلسل للموت ٣ كان مفاجأة كبيرة للجمهور، خبرينا شوي عن هالمشاركة وقديش فكرتي بالموضوع قبل الموافقة على الدور؟
بالنسبة لمسلسل للموت ٣ هيي مفاجأة حلوة، مش قصة فكرت بالموضوع كتير، حكيوني وانعرض عليي الدور وحبيت الشخصية شو محلا من الإعراب متل ما بقولو، شو محلا من كل هالقصة ووقعا بالجزء الثالث.
لهيك أكيد قبلت، فضلاً عن إنو العمل ناجح ومخرج العمل فيليب أسمر شاغلين سوى كتير أعمال ناجحة والكاتبة نادين جابر أول مرة بتعامل معا وأكيد شركة الإنتاج شاغلين سوى كتير أعمال ناجحة. أكيد كل القصة ركبت ووافقت عالدور والحمدالله عم نشتغل بشغف وباخلاص ومتعة.
- بين ريم وسحر بالجزئين الأول والثاني من للموت أي شخصية شخصية استفزتك أكتر؟
بين ريم وسحر ما فيي إختار، بكل جزء مختلف عن التاني والشخصيتين بنفس الكفة عندي، تنيناتن بكملو بعض، تنيناتن بيضعفو تنيناتن بيقو تنيناتن بروحو بمشاعرن للاخر. إذا أنا عم تحكيني كسحر وريم
ما في وحدة استفزتني أكتر، كل وحدة شي، كل وحدة إلا قصتا، كل وحدة إلى مكنوناتها وتصرفاتها، تنينتن شخصيتين كتير حلوين.
- عطول منشهد على خلافات بين الممثلات اللبنانيات، وإنت من بداياتك بعيدة كل البعد عن هالموجة. شو تعليقك عالموضوع؟
بتأسف على هالخلافات لأن ما بتقدم ولا بتأخر، بتخلق جو مش حلو وسمعة مش حلوة ونحنا بدنا دايماً نشتغل على إنو نحسن سمعتنا بالمهنة ونتقدم لقدام وهيدي الخلافات كتير بتأخرنا لورا، وبتدل على قلة مهنية. ما بيخلى الأمر ببلاد برا وهون الخلافات بتضل موجودة لو في ناس حاولت تصلح الاشيا الأمور هي لحالا يا بتتصلح بتكون عن نوايا مظبوطة يا لأ.
وأنا بعيدي من الأساس عن هالمشاكل وبجرب ابعد عنا، أوقات بورطوني بمحل ما، بس أكيد بتذاكا عليا وبطلع منا ما بحبا أبداً لأن يلي عندو ثقة بنفسو ما بيسمح لأي خلاف يصير لأن كل حداً عندو حيثيتو وعندو مكانتو، وكل حدا عندو نجاحو وما لازم تكون في محل للخلافات.
- فينا نقول إنو ورد الخال مسيرة طويلة من النجاحات ولعبتي كل الأدوار تقريباً، شو الدور يلي بعد ما لعبتي؟
ما بقدر قول ايلي شو الدور يلي بحب إلعبو وبعد ما صار، في كتير اشيا، الممثل ما بيوصل لمرحلة بقول خلص أو اكتفيت أبداً الممثل بكل عمل كأنو من الصفر كأن ما بيعرف شي ومش مثل قبل أنا بحكي هيك عن حالي، دايماً ما كأن عاملة ٢٠ أو ٢٥ سنة تمثيل، بأي دور بلعبو بحس حالي جديدة بحس حالي أوقات مني متملكي الشغلة حتى إرجع صيبا مظبوط لأن مش هيك الواحد يمثل ويالله بيمسك شخصية وبيمشي فيا، كتير صعب انك تكون بحلة جديدة، شخصية جديدة ونفسية جديدة وتصرف جديد بكل شي.
بالنسبة إلي ما في شخصية معينة، قديش في بالكرة الارضية شخصيات هلقد التمثيل بيستوعب ما حدا متل الثاني ما حداً شكلو متل الثاني أو بيتصرف متل الثاني، عالم كتير كبير وما بقدر حدد أنا شو بعد بحب وبكتير من الأوقات الأوضاع بتتشابه بس الشخصيات ما بتتشابه.
شكر كبير للممثلة الرائعة قلباً وقالباً ورد الخال وكل التوفيق بكل اعمالك.
