كتب إيلي مكرزل في موقع JNews Lebanon
قبل إنطلاق عرض فيلم “ع مفرق طريق” ب 3 و4 كانون الأول بالسعودية ضمن مهرجان “البحر الأحمر السينمائي الدولي” وقبل عرضو بالصالات اللبنانية ب ١٥ كانون الأول، وابتداءً من كانون الثاني 2023 بكل دول العالم، حبينا بدردشة سريعة مع بطل العمل الممثل شادي حداد نعرف تفاصيل أكتر عن الفيلم وعن تجربتو الجديدة.
– شادي شتقنالك وين هالغيبة؟
وأنا كمان شتقتلكن، أنا إجمالاً كتير بهتم بنوعية اعمالي أكتر من الكمية، كرمال هيك بتأنى بالأدوار يلي بطلع فيا، وعطول بفتش على دور يتحداني ما بدي دور يقطع مرور الكرام هيك معودين عليي وأنا بحب حافظ على هيدا الخط.
– وين شادي حداد عالساحة وليش ما منشوفك بكثافة بالمسلسلات اللبنانية وحتى المشتركة ؟
بعد سنين من الشغل الشخص بس يوصل لمطرح بحب يحافظ على المكان يلي وصولو وما يرجع لورا، وأنا هيدا مبدأي بشغلي ما بدي إرجع لورا بالأدوار يلي عم بعملا وما بدي أخسر كل هالسنين يلي شتغلتا بحياتي بمجرد دور حتى كون موجود والعالم ما تنسيني والقصص يلي كانت عم تنطرح عليي ما كانت رح تقدمني أبداً على الصعيد المهني الفني، لهيك كنت عم بعتذر وفي قصص ما كانت عم توصلني وفي كتير شرك عندا ناسها وعندا الأشخاص يلي هي عم تشتغل معن الله يوفق الجميع وبالنهاية كل واحد بياخد رزقتو بهالحياة.
أنا موجود بلبنان وحاضر إذا نعرض عليي شي حلو بيتحداني كممثل وبخليني كون موجود بطريقة حافظ فيا على كل شي عملتو قبل وعلى مسيرتي كممثل أنا موجود.
– ” ع مفرق طريق” الفيلم يلي رح ينطلق عرضو بشهر كانون الأول من بطولتك، خبرنا شوي عن هالعمل.
“ع مفرق طريق” هوي فيلم رومانسي كوميدي بيحكي عن ممثل اسمو “هادي نجم” معجوق بالشهرة والنجومية. بيجي عرض حتى يلعب دور قداسة البابا، فبقرر بعجقة شغلو وكل المشاكل يلي عم يعاني منا بالتصوير، يروح يرتاح. هوي وطالع على وادي قنوبين بمنطقتو بصير معو حادثة بتغيرلو كل مشروع حياتو، هاللقاء مع الراهبات والصبية يلي بيتلاقى فين بحطو قدام مفرق طريق بحياتو بتخلي يرجع لحالو حتى يرجع للسلام لهوي بحاجه إلو ولجوهر الحياة وللبساطة. هيدا ايلي بالمختصر، أكيد بالإضافي لاحداث كتيرة بتصير، أحداث مهضومة كوميدية، قصص مش بس بتشبه مجتمعنا اللبناني، بتشبه كل المجتمعات يعني هيدا فيلم إذا فيي قول بحاكي كل المجتمعات، لأن بعز صخب الحياة وهالركض يلي عم منعيشو وعجقة الدني عم ننسى نسمع لحالنا عم ننسى إنو في اشيا بسيطة بالحياة نحن بحاجة نرجعلا وهي مهمة وهيدا مغزى الفيلم إنو ما ننسى دايماً إنو نرجع لجوهر وبساطة الحياة، وقد ما عجقت فينا الدني دايماً في محل نتركو حتى نسمع حالنا ونبش عالسلام بقلبنا لنحنا بحاجة إلو من وقت للتاني.
– يلي بتابع البرومو الترويجي للعمل بلاحظ إنو في جرأة من خلال طرح الموضوع خاصةً إنو الممثلات عم يلعبو دور راهبات، ما خفت من الانتقادات أو الكلام يلي معقول يصدر عن مصادر دينية؟
أنا ما بعتبرا جرأة صراحةً، صحيح إنو هيدي أول مرة بكون في راهبات بفيلم مش ديني على الصعيد اللبناني بس أبداً ما فيا جرأة، نحنا عم منضوي على راهبات عايشين بقلب ضيعة لبنانية حبينا من خلال هالضيعة نفرجي صورة لبنان يلي نحنا منحب نشوفا، لبنان لي ديماً حلو، تعبنا من بعد إنفجار ٤ أب وكل هالأزمات يلي عم نعيشا ونشوف كل شي بشع بلبنان. لأ بلدنا بعدو حلو رغم كل شي وهيدي الصورة لبدنا نحافظ عليا، بدنا بلدنا يضل موجود، بعيون العالم حلو وبعيونا نحنا كمان. أنا ما بعتبرا جرأة، هي طرح موضوع وشاءت الصدف إنو بهيدا الموضوع المطروح في ٤ راهبات يلي عم منفرجي كيف بعيشو حياتن اليومية بطريقة بسيطة، بطريقة مش مضوى عليا من قبل. أما عن الانتقادات أنا بتمنى من العالم يحضرو العمل قبل ما يوجهوا إنتقاد، أكيد أنا مع الانتقادات البناءة طبعاً وهيدا الشي إضافي كان إلي أو للعمل.
فيلم “ع مفرق طريق” منو فيلم ديني هوي فيلم روحاني وبحاكي كل الأديان وكل المجتمعات وخلال الفيلم كان معنا مستشار روحي، الأب “فريد صعب” يلي كان مرافقني بكل تحضيرات العمل خاصةً إنو الفيلم هوي فكرتي، خلال كتابة النص وبس خلص وخلال التصوير وحتى مع إنتهاء التصوير، حتى إذا في شي بيخدش الكنيسة نحنا نكون حريصين على هالموضوع وأنا وفريق العمل ما منسمح إنو نستفز أو نتعرض للكنيسة بالعكس نحنا عنا موافقة من سيدنا البطرك ومن المركز الإعلامي الكاتوليكي يلي حضروا الفيلم ووافقوا عليه وأثنوا كتير على الفيلم قديش هوي حلو وإضافي.
وبالنهاية ايلي أنا إبن كنيسة أولاً وبرجع بقول “ع مفرق طريق” منو فيلم ديني هوي فيلم رومانسي، كوميدي مهضوم .
أكيد إذا كان في انتقادات نحنا جاهزين وبالنهاية ما فيك ترضي كل العالم.
– بعد “ع مفرق طريق” شو ناطرنا؟
عم ينحكى عن تحضير لعملين، واحد على صعيد عربي رح يتصور برا بس بعدو قيد التحضير وفي فيلم تاني كمان قيد التحضير بعدنا بالفكرة ما تبلورت كل الأمور. وانشالله خير.
بنهاية حديثنا شادي كل التوفيق الك ولكل فريق العمل وناطرينك بكل جديدك.
فيلم “ع مفرق طريق” من كتابة جوزفين حبشي، إخراج لارا سابا بطولة شادي حداد، بيتي توتل، جوليا قصار، ميرنا مكرزل، سينتيا كرم وربى زعرور، إنتاج Wakanda Films وشادي حداد بالتعاون مع “أي أر تي”، بدعم من CMC وشويري غروب، التوزيع بلبنان لـ”Arab Motion” وبكل بلدان العالم لـ”Cedars Art Production”.
