كتب إيلي مكرزل في موقع JNews Lebanon
رح نكون مسا اليوم على موعد مع حدث Arab Queen of Fitness Beirut ، من هون كان النا دردشة سريعة مع السيدة إيمان أبو نكد لنتعرف أكتر على التفاصيل هالحدث.
ببداية حديثنا إيمان لكل شخص ما بيعرفك، من هي إيمان أبو نكد؟
إيمان أبو نكد شخص بحب لبنان كتير، وبعدني بآمن إنو بهالبلد في كتير قصص فينا نعملا، وبعدني بآمن إنو كل إنطلاقة لعمل عربي لازم تنطلق من لبنان وعندي إيمان كبير إنو لبنان كان ورح يبقى بلد الجمال.
Arab Queen of Fitness Beirut فكرة جديدة بوطنا العربي، خبرينا شوي عنا؟
Arab Queen of Fitness Beirut حدث ما بيشبه أي حدث، منو حدث إنتخاب جمالي، نحنا استدرجنا الصبايا عالصحة عبر الجمال، لأن الفتاة بتحب الأضواء، وبالسابق ما كنا كتير نشوف مشتركات بشاركو صورن Before and After من بعد ما عملنا هالحدث والأضواء والإعلام والشهرة، صرت إسمع كتير أشخاص بقولولي إيمان ممكن صير ملكة؟
بظل وجود كتير من المهرجانات وال Events شو يلي بميز Arab Queen of Fitness Beirut ؟
لازم الناس تعرف فكرة هالحدث كتير منيح مع احترامي للجميع هالحدث مختلف كلياً، هو حدث صحي وإنساني اخر شي جمالي. ما في شي اسمو ملكة جمال الرشاقة يلي عم نعملو نحنا هو ملكة الصحة وملكة الرشاقة
وبحب قول ايلي إنو أنا إيمان أبو نكد كنت انصح ب ٥٣ كيلو حست قديش قيمة الصحة وقديش الانسان بكون مرتاح حتى لو ما حدا زعجو.
في كتير صبايا بعانو من التنمر من عدم نجاحن بالمجتمع، أنا بالعكس كنت ناجحة بس عطول بقول يلي بدو يجرب يخسر من وزنو كرمال صحتو لأن النصاحة مرض.
هالحدث نجح بتغيير حياة كتير من الصبايا يلي ما كانو مامنين بالتغيير وكل سنة عم يطور خاصةً إنو هيدا سادس موسم النا. بأحد الموسم ” crown of fitness junior” للولاد الزغار كان من انجح وأغلى المواسم ع قلبي لأن الطفل قديش كان يعاني من تنمر بالمدارس والمجتمع وقدرنا بوقتا نشتغل عمجموعات كتير كبيرة وكانت توعية كتير حلوة حتى وصلنا إنو هيدا الموسم يكون عربي.
– ما كان في خوف من الأوضاع يلي عم يمرق فيا لبنان؟
عطول أنا بقول كل حداً بهالفترة بيعمل Event عنجد قولولو Chapeau bas إذا كان ناجح أو نص ناجح ما بدي زقيف للمش ناجح بس صدقني أي شخص ممكن يغامر إنو يعمل شي بهالبلد بأبشع الأوقات وديماً على اعصابنا لأن عطول كل شي بهالبلد مش محسوب ايلي، مبلا خفنا بس قررنا بالاخر وعطول بقولا خلقنا بهالبلد عم مناضل ورح نضل ناضل ونشالله نوصل لمرحلة نرتاح.
– شو هي خطوات إيمان أبو نكد بالمستقبل؟
بعد إنتهاء هالحدث السنة يلي انطلقنا منو عربياً من قلب بيروت رح ننطلق للعالم العربي ونشالله نكون بدبي بال ٢٠٢٣ بنفس القضية ونفس المفهوم لأن قضيتنا أولاً وأخيراً هي الصحة والانسان وطبيعة ما مننكر
الجمال لأن الانسان بس يكون بصحة جيدة من جوا بيطلع الجمال، هيدا منو شعر صدقني ايلي لأن الصحة والجمال بكملو بعض هني توأم
كل التوفيق للرائعة قلباً وقالباً إيمان أبو نكد ومن موقع JNEWS LEBANON كل التوفيق والنجاح
تجدر الإشارة أن Arab Queen of Fitness Beirut سيقام يوم الجمعة ٢٥ في فندق حبتور.
